Privatiusumik ilaqutariinniit suliffeqarfik pigineqartoq Polar Seafood annertoqisumik tapiinertik aqqutigalugu nunatsinni ilaqutariinnut meerartalinnut allanngueqataapput. Polar Seafood Nanu Meeqqat Juulliannut 15.000 koruunimik tapiissuteqarput, taamaasillutik ilaqutariit meerartallit qulit sinnerlugit julehjælp-imik agguaavigineqarnissaat qulakkeerlugu. Tamannalu Nanu Meeqqaniit qujamasuutigeqaarput, taamammi tapiiffigineqartinnata tapersersorneqaratalu ilaqutariinnut meerartalinnut juullilernerani agguaasinnaanngilagut – Polar Seafood qujanaq.
Meeqqaat siunissaraagut
Polar Seafood-imut inuiaqatigiinnut tunniussisinnaaneq pingaaruteqartuuvoq, sualummik tapiinerit nunatsinni meeqqanut ingerlagaangata. Suliffeqarfik ukiorpassuarni Uummannami Qaanaamilu meeqqat angerlarsimaffiinut tapiisarsimapput. ”Meeqqat siunissaraagut, suliffeqarfittullu siunissarput meerartagullu periarfissaqartilluta tapersersorusuttuarpagut” Laila Salling tapiisimanerat eqqartulaarniarlugu naapikkatsigu oqarpoq. “Nammineerluta privatiusumik pigineqarluta suliffeqarfiuvugut, takugaangatsigulu privatiusumik meeqqanut suliniuteqartoqartoq tapersersuinissasinnullu periarfissaqarutta pingaartitarisuuarput periarfissarlu iluatigisarlugu” nangippoq.
Matu ammajuarpoq
Polar Seafood Kalaallit Nunaanni aalisakkanik tunisassiorfiit namminersortut annersarigaluaraat, skandinaviamilu annersaat ilaat, iserlugu angerlarsimaffiorpalaarpoq ilisarnartutut misigititsisoq. Allaffimmi natersuit angerlarsimaffimmi natersuarisartakkanik sumi tamaani takussaasoqarpoq, sulisut inussiarnersuupput, amerlasuut ukiorpassuarni sulisimasut. Malunnarpoq kinaluunniit tikilluaqqusaasoq, matumi ammajuarpoq. “Suliffeqarfimmik pilersitsisunut pingaaruteqarsimavoq aalisartunut allaffimmilu sulisunut toqqaannaq atassuteqarnissaq. Suliffeqarfitsinni kulturiuvoq, nunamut tunngasorujussuuvugut tamattalu kinaagaluarutta immitsinnut oqaluussinnaalluta” Laila tulluusimaarluni oqaluttuarpoq.
Suliniutitsinnut tapersersuerusuppit
Nanu Meeqqani ilaqutariinnut meerartalinnut nunatsinni najugalinnut julehjælp-imik agguaasinnaanngilagut taperserneqartinnata. Ilaqutariit meeratallit ikiorigut ikiortigut tapiinikkut:
Konto normu: 6471-7848622
MobilePay: 106929
Qujanaq!