Ulluni makkunani NANUBØRN-imi ukioq manna Nanu Meeqqat Juulliannut suliniutit ingerlatileruttorpagut. Suliniut taanna 2008-mi aallartippoq, Nanu Meeqqat Juulliannik taaneqartarluni.
Ukiup ingerlanerani NANUBØRN-imi tapiissutinik katersisarpugut, taakkulu ilaat nuna tamakkerlugu ilaqutariinnut juullimi atugassatut immikkoortinneqartarput, juullimi amerlasuunut aningaasatigut artukkiisinnaasarmat.
Aningaasat ilaqutariinnut meerartalinnut tunniunneqartut assersuutigalugu juulimi nerisassanut, orpimmut, orpiup pinnersaataanut imaluunniit meeqqanut tunissutissanut atugassaapput. Juullimullu ikiuutit sumi najugaqarneq apeqqutaatillugu Pisiffimmut Pilersuisumulluunniit pisissutissatut allagartanngorlugit tunniunneqartarput (NANUBØRN-imiillu erseqqissarparput ikiorsiissut assersuutigalugu tupanut, imigassanut imaluunniit danske spil-iniit tuniniakkanut atorneqarsinnaannginnera).
Ilaqutariinut ataatsinut DKK 1000 kr.-nik tuniussinissaq naatsorsuutigaarput, saniatigullu ilaqutariinni meerartaasut immikkut meeqqamut ataatimut aamma DKK 500-nik tapiissalluta. 2021-mi nuna tamakkerlugu ilaqutariit meerartallit illoqarfinni nunaqarfinnilu assigiinngitsuni najugallit 258-it, meeqqallu 500-t sinneqartut, ikiorpavut.
2023-mi anguniagaraarput ilaqutariit meerartallit 400-nik ikinnerunngitsut ikiorsinnaanissaat, taamaattumillu illit suliffeqarfivit ikiuunnissaa pisariaqartipparput!
Nunatsinnilu suliffeqarfiit suliniummut tassunga tapiissutaat tamavimmik, ilaqutariit nunatsinniittunut amerlasuut juullimik qaamasumik misigisaqarnissaannut qulakkeereqataassapput.
Iliuusissat:
Siunertamut pitsaasumut tapiissuteqarnissaq kissaatigigussiuk – tapiissutit amerlappata annikippataluunniit tamaasa qujarullugit – aningaasanik uunga nuussisoqarsinnaavoq: 6471-7848622.
Suliniut taanna tapiissuteqarfigissallugu aaliangerussi, qinnuigaassi e-mailimik suliffeqarfissi ilisarnaataanik takussutissartalimmik uunga nassitseqqullusi: hej@nanu.gl. Ilisarnaatersi nittartakkatsinni, tapiissuteqartunut qujassuteqarnitsinni atussavarput – tapiissutillu annertussusaat naapertorlugu suliffeqarfiit aqqi tulleriiaarneqassapput, tapiissuteqarnerit qulliutillugit.
Aammattaaq 2024-mut inuit attaveqaqatigiittarfii aqqutigalugit tapiisimaneq ussassaarutigissavarput, tassanilu aamma suliffeqarfissi immikkut nittarsaanneqarsinnaassaaq.
Annertujaamik tapiisut ataatsimeeqatiginissaat kissaatigissavarput, inuit attaveqaqatigiittarfiisigut aammalu nittartakkatsigut, NANUBØRN-imiit ilissi suliffeqarfissi oqaluttuarinissaa siunertaralugu.
Apeqqutissaqarussi ukununnga saaffiginninnissamut periarfissaqarpusi:
Mona Steenholdt
mail: mona@nanu.gl
mobil: +299 52 95 59
Johanne L. Knudsen
mail: johanne@nanu.gl
mobil: +299 56 22 50