Ukioq manna aamma nunarput tamakkerlugu ilaqutariinnut meerartalinnut juullimi tunissutisiutissanik pissarsiniarluta qinnuteqaatinik nassiussivugut. Ukioq mannalu siunnerfigaarput nunatsinni illoqarfinni/nunaqarfinni tamani juullimut ikiorsiissutinik tunniussisinnaanissarput. Iluatsinngujoorporlu.
Suli ullut pingasut periarfissaraagut illoqarfillu marlussunnguit amigaatigalugit. Nalunngilarpulli anguniagaq angujumaarlugu – taamallu 2020-i tassaalersissallugu nunatsinni illoqarfinnut/nunaqarfinnut tamanut anngussiviusussaq.
Inuuniarneq ukioq naallugu unamminartortaqartarpoq, minnerunngitsumik eqqugaasinnaanermik sanngiitsumillu inuunneqartunut. Ilaqutariillu taaneqartutut inissisimasut amerlavallaarput, uagullu anguniartuarparput, taartumi qaamanermik takusassaqartitsinissaq, minnerunngitsumik juullikkunni pissaqanngikkaanni taartorujussuarmiinnermik misigititsiviussinnaasumi.
Maanna ukiuni 12-ini tulleriiginnarni aningaasaliisartut aaliangersimasut ikiortigalugit qaamaninnguamik nuannaarnermillu tunniussisinnaasarsimalerpugut. Taakkumi ”Meeqqat juulliannik” taallugu ingerlattakkatsinni ikiuiuartarput.
Ukioq mannalu rockimik nipilersortartut nuannarilluakkagut NANOOK immikkut tunissuteqarputtaaq. Tassami siunertamut 33.000,- koruuninik tunissuteqarput immikkut kissaatigalugu taakku Ittoqqortoormiini, Kulusummi Tasiilamilu atorneqassasut. Aningaasallu taakku taamatut iliornissamut periarfissiilluarput. Kiisalu tunniussiuartartut avataatigut aningaasaateqarfimmit isertuuteqqusumit aamma tunissuteqarfigineqarpugut. Makkulu qutsavigiumavagut:
- Pisiffik
- Brugseni
- Helene & Svend Junges Fond
- Nuna fonden
- Comby A/S
- Malugiuk
Nunarput tamakkerlugu kommunit isumaginninnermut immikkoortortqarfiinit peqqissaasunillu ikiortigalugit, ilaqutariit ikiorneqarnissamik pisariaqartitsinerpaajusut nassaarivagut, tamallu tamakku nerisassanik tunissutinillu anngussivigisinnaalerlugit. Taaneqartummi taakku ilaqutariit meeqqallu iliuuseqarfigisassassaqqissut kikkuusut nalunngilaat, taamaattumillu taakku tassaallutik ikugassaqqissunik uatsinnut innersuussuteqartartuusut.
Iikiukkatsinniillu utertitsiffigineqartarnigut tuppallernartaqaat. Inunnguit qullipillutik tunissutisiutissaminnik aallertut, nerisassanik tunissutissaminnillu pisisinnaalersut. Tamannalu anguneqarsinnaasimanavianngik–kaluarpoq aningaasaliillutik tunuliaqutsiisartugut piunngikkaluarpata ukioq maannalu aamma ilaallutik NANOOK.
Naalli juullimut ikiorsiininiarnitsinni atugassatsinnik tunineqaraluarluta, tamanna tamatigut naammanngilaq. Taamaattumik ungasinngitsukkut nittartagartaassaagut, inuinnaat suliffeqarfiillu juulliinnaangitsukkut tunniussaqarniarnerminni aqqutigisinnaaligassaannik. Taassuma piareernissaa ilisaritissinnaalernissaalu qilanaaraarput.
Ikiuiniarnermut atatillugu iliuuseqartunut tamassinnut QUJANARSUAQ – amerleqaasi.
Tamassi juullimik nuannersumik eqqissisimasumillu kissaallusi ilanngullugu ukiortaassap nuannersuullunilu qiimaffiunissaanik kissaappassi.
Krissie Berthelsen Winberg
Nanubørn/Nanu Meeqqat