Aluu
Mona Torp-imik ateqarpunga. Qanittumi NANU MEEQQAT-ni siulersuisuni siulittaasunngoqqammerpunga pilersitsisup Krissiep tunuarnerata kingorna. Uani nutaarsiassaq atuarneqarsinnaavoq.
NANU MEEQQAT Juulliat – suliaq uummammeersoq
NANU-mi sulisussanngorninnut tunngaviit annerpaat tassaavoq NANU-p ukiut tamaasa suliaq ingerlattagaa: NANU MEEQQAT Juulliat.
Ukiut tamaasa NANU aningaasanik katersisarpoq ilaqutariinnut meeralinnut juullilernerani ingerlateqqinneqartartunik.
Erseqqissarlugu NANU aningaasanik qinnuteqartarpoq, katersallu taakkua gavekortinngorlutik ilaqutariinnut meeralinnut nunarput tamakkerlugu najugalinnut ingerlateqqinneqartarlutik. Katersat atorlugit ilaqutariit juullilernerani nerisassanut, tunissutissanut atorfissaqartitsisunullu ikiuinertut tunniunneqartarput meeqqatik peqatigalugit juullisiorluarsinnaaniassammata – NANU MEEQQAT juulliat.
Ilaqutariinnut 1.000 koruuni meeqqamullu ataatsimut 500 koruuni tunngavigalugit gavekortit pisiarisarpagut.
Gavekortit taakkua ilaqutariit pisinniarfiliarsinnaanissaannut periarfissiisuupput, soorlu juullimi nerisassanut. Gavekortit imigassanut assigisaannullu atorneqarsinnaanngillat.
Brugsemi, Pisiffik kiisalu Pilersuisoq suleqatigilluarpagut.
Taakkua saniatigut peqqinnissaqarfik kommunellu suleqatigilluarpaguttaaq. Taakkua ikiuineratigut suleqatigineranilu ilaqutariit atorfissaqartitsisut ikiugassallu kikkuunissaat inissittarparput.
Ilaassavisi?
Anguniagaqaarput nunaqarfinni ilaqutariit tallimat kiisalu illoqarfinni ilaqutariit qulit ikiornissaat.
Tassanilu ikiueqataasinnaavusi! 🙂
Nunatsinni suliffeqarfiit tapiinngippata anguniakkagut angusinnaanngilagut.
Paasissutissat
Tapeerusukkussi – annikitsumik annertunerusumilluunniit, tamarmimmi iluaqutaasussaapput – tikilluaqqusaangaarpusi aningaaserivitsinni kontomut uunga: 6471-7848622 ikisissallusi.
Anguniakkagut angussagutsigit minnerpaamik 300.000 koruuni katersortussaavarput – taamaammat tapiissutaasinnaasut tamarmik tikilluaqqusaangaarput.
Tapiissagussi e-mailimik suliffeqarfissi ilisarnaataa ilanngullugu nassiussilaassaasi, taamaasilluta suliffeqarfissi qujaffiginissaanut periarfissaqassaagut. Nittartagatsinni quppernermik pilersitsisussaavugut. Taassuma saniatigut Sermitsiaq aamma AG-mi ukiup nutaap aallartinnerani qujassuteqartussaavugut.
Tapiissut annertuneruppat naapilaarnissatsinnut qaaqqusivunga, oqaluttuanngortissinnaaniassavarput Facebook-imi quppernitsinni nittartakkamilu saqqummiunneqartussamik.
Attavissat
Apeqqutissaqassagussi uunga:
Tikilluaqqusaavusi saaffiginnissallusi.
Tusarfiginissarsi qilanaaralugu.
Inussiarnersumik
Mona Torp