Menu
2008-mili ilaqutariinnut meerartalinnut nunatsinni najugalinnut suliniuteqalersimavugut. Suliniut ilisimaneqarluarpoq ilaqutariippassuillu neriuutigisarpaat taperneqassallutik.
Meeqqat tamarmik juullisiorluarnissaat kissaatiginaqaaq, ilaqutariippassuarnulli tamanna piviusuunngilaq.
Taamaammat NANU Meeqqat 2008-mili NANU Meeqqat Juulliat suliniutiginikuuaa. NANU-mit aningaasat aningaasaateqarfinnit suliffeqarfinnit inuinnarnilu katersat nunatsinni tamani ilaqutaariinnut meerartalinnut atorfissaqartitsisunut ingerlateqqinneqartarput juullisiutissatut.
Suliniut aqqutigalugu piffissami taarnerusumi qaamanermik pilersitserusuppugut, ilaqutariit orpiup nalaani katersuussimasut, juullimut nerisassat kiisalu immaqa meeqqat poortugassaat ataaseq marlunnguilluunniit.
Erseqqissarlugu NANU aningaasanik katersisarpoq, katersallu taakkua gavekortinngorlutik ilaqutariinnut meeralinnut nunarput tamakkerlugu najugalinnut ingerlateqqinneqartarlutik. Katersat atorlugit ilaqutariit juullilernerani nerisassanut, tunissutissanut atorfissaqartitsisunullu ikiuinertut tunniunneqartarput meeqqatik peqatigalugit juullisiorluarsinnaaniassammata – NANU MEEQQAT juulliat.
Ilaqutariinnut 1.000 koruuni meeqqamullu ataatsimut 500 koruuni tunngavigalugit gavekortit pisiarisarpagut. Gavekortit taakkua ilaqutariit pisinniarfiliarsinnaanissaannut periarfissiisuupput, soorlu juullimi nerisassanut. Gavekortit imigassanut, lotto-mut assigisaannullu atorneqarsinnaanngillat.
Sineriak tamakkerlugu pisinniarfiit suleqatigilluarpagut, taamaasilluni julehjælp-imik pinnattut sumiluunniit najugaqarunik assigiissaaq.
Qinnuteqartussanullu nittartakkatsinni qinnuteqaatit ingerlasarput, periuseq ilaqutariinnit meertartalinnit tigulluarneqarnikoq.
Katersuinissatsinnut akuersissut ukiut tamaasa isumagisarparput, kiisalu revisorimit ukiut tamaasa misissorneqartarlu.
Ilaqutariinnut meerartalinnut julehjælp-imik agguaasinnaaniarluta taperneqarnissarput pisariaqartipparput. Kajumissutsitsinnik suliaqartuuvugut tapiissutinik ingerlatitseqqissinnaasut.
Kontotsinnut: 6471-7848622 toqqaannartumik ikisisinnaavutit.
MobilePay normu atorlugu tapiisinnaavutit: 106929
Suliffeqarfiuguit eqqaamalaassavat e-mailimik nassissalluta suliffeqarfissi ilisarnaataa ilanngullugu! Taannami ukioq manna suliniut pillugu qupperneq pilersitassatsinnut atortussaavarput.
Tapiissut annertuneruppat naapilaarnissatsinnut qaaqqusivugut, tapiissutersi oqaluttuanngortissinnaaniassavarput Facebook-imi, Instagram-imi nittartakkamilu saqqummiunneqartussamik ☺️