INI A/S NANU Meeqqat Juulliannut tunissuteqarpoq

NANU Meeqqat Juulliat

Ukiuni kingullerni 11-ninni NANU Meeqqat NANU Meeqqat Juulliat ingerlannikuuaat ukioq mannalu aamma ingerlateqqillugu. NANU aningaasanik aningaasaateqarfinnut, suliffeqarfinnut tunissuteqarusuttunilu qinnuteqartarpoq. Aningaasat katersat ilaqutariinnut meeralinnut nunatsinni tamani najugalinnut ingerlateqqinneqartarput. 

Suliap ilaqutariit meerallit juullisioqatigiinnissaat tapersersortarpaa, meeqqat ilaqutariillu tapersersugassat juullisiorluarnerunissaat anguniarlugu.  

Suliniut aningaasatigut tapersersorneqarnikkut kisimi iluatsissinnaavoq – tassanilu aamma INI A/S-ip tunissuteqarnera annertoqisoq NANU-mi qujamasuutigeqisarput. 

INI A/S

INI A/S-ip suliassaasa pingaarnersaat ilagaat inissiat assigiissaartumik allaffissornikkut ingerlatsinissaa. Inissiat Namminersorlutik Oqartussanit kommuneniillu pigineqartut. 
Inissianik piginnittut attartortullu akornanni ataqatigiissitsisuuvoq. 
INI A/S Sisimiuni qullersaqarfeqarpoq sineriammili illoqarfinni tamangajanni allaffeqarluni 150-illu missaani sulisoqarluni. 

INI A/S meeqqanut suliniutinik aallussivoq

NANU Meeqqat Juulliannut tunissut annertoqisoq INI-p suliniutaattut kisertaanngilaq, arlalinnilli iliuuseqartuupput. Assersuutitut eqqaaneqarsinnaavoq “Meeqqat Oqartussaaqataanerat Sisimiuni”. Suliniutip siunertaraa meeqqat najugaqarfimminni atukkaminnik pitsanngorsaanissaq siunertaralugu aalajangeeqataasinnaallutillu sunniuteqaqataalersinneqarnissaat.

Suliniut iliuutsinik aaliangersimasunik kinguneqarnikkuuvoq, assersuutitullu taaneqarsinnaavoq meeqqap qimmit angalaannartut toqqissisimanarinnginneranik oqaaseqarsimanerata kingorna INI-p qimuttut peqatigiit suliniuteqarumallutik saaffiginninneraniik kinguneqartoq. Una toorlugu paasisaqarnerugit. 

INI A/S-ip csr iluani suliniutaanut tulluarluarpoq

NANU Meeqqat Juulliat nuna tamakkerlugu ikiuinera INI-p nuna tamakkerlugu aamma sullissineranut tulluarluartuuvoq. Tassa imaappoq INI A/S-ip NANU Meeqqat Juulliannut tunissuteqarnermini nuna tamakkerlugu sullitaminnut aamma ikiuipput. Una toorlugu suliniutit pillugit paasisaqarnerugit. 

Qujanaq

Ikioqatigiinnikkut tapersersoqatigiinnikkullu tamavitta angusaqarnerusinnaavugut, ingammik juulleriartornerani. NANU-mi kajumissutsitsinnik sulisuuvugut, aningaasaateqarfiit suliffeqarfiit tunniussisullu tapersersuineratigut suliniutigut iluatsissinnaavagut. Suliniutit taartumi qaamanermik pilersitsisussat – nuna tamakkerlugu. 

NANU Meeqqanit INI A/S-imut qujarujussuarpugut taamak annertutigisumik tunissuteqarnissinnut – allat ikiorigut ikiorpatsigut, qujanaq ❤️

Aamma illit ikiuisugut ikiorusuppitigut? Taava konto normorput aajuna: 6471-7848622

Qujanaq ❤️

Leave a Reply

Your email address will not be published. Required fields are marked *